Tri pot najampot

Fčera je k nam došla moja školska pajdašica i to tri pot najampot. Ve se sigorno pitate kak tri pot. Vam povem kak.

Prvo:
De na vrota onak kaj najlepša bombonjera. Dešeča, našminkana, nafrezerana, blečena kaj z štacuna. Japica jo odmeri i veli
– dober den! Jo sam Iva a vi ste najlepša pucka kaj sam jo videl.
Mojčika ga je z kuhinjskom krpom vdropila po tikvi, frknola z nosom i dišla v kuhnjo.

Drugo:
Predvečer se Mirika ( pajdašica) išla “malo sfriškati” pred sponje. Japica je zadremal pred tevejom i dok je ona došla onak bez šminke, sam v piđami i z ručnikom namotanim koli glove, on se zdromil, pogleda jo i veli
– dober večer gospa! Lepo je kaj sje ona pucka i mamiko pozvola. Jo sam inače Iva.
Mojčika ga je pok vdropila z krpom a mi smo se si po skrivečki smejali.
Bormeš nebi da smo znali kaj nas čoka.

Tretje:
Mirika je dišla kaj se “spicanji” pred sponje jer to delajo se moderne žene. (Tak ona veli. Jo sam ne moderna)
Mi smo lepo si v miro gledali filma a onda je najampot srčeko prebledel, mojčika se za herc zgrobila, kujsek je pobegel v ganjk, mej je špeh opal z kruha a japica je zgrabil boto i zakričal
– iš, iššš nečastivi! Ki te vrog dovlekel vo našo hižo! Najampot zovite policajce! Dojdi bliže i vdropim te z botom kaj cucka! ( kujsek je išče bolje cvilil)
Nam je trebalo nekaj časa kaj demo k sej dok nam je Mirika dopovedala da je to ona cpot te nekve bjutimaske.
Dok je vjutro odhojala japica je rekel
– som Bog kaj so dišle se tri! Ovo me koštalo pet let života i pol litre žganice! Ak išče šteripot dojdejo jo idem od hiže. Mom!
Normalno, pok je dobil s krpom po tikvanji.

Ali kaj da rečem…si smo si morali dvopot po nul tri vdropiti potlji one bjutimaske.
Bog z njom (z semi tremi) a bormeš i z nami.
Idem si ve malo od sega odehnem.

Suzana Martinuš

*********************************INTERMEZZO**********************************