Torta

U sklopu projekta „Nisam danguba, samo stvaram povijest – zlatne godine koje govore“ i programa „Život se ne arhivira – on se piše“, donosimo vam istinitu humoresku Irene Vičević pod naslovom „Torta“ – priču koja miriše na stara vremena, svatove, običaje, kumstva i jednu veliku, ponosno ukrašenu tortu koja je trebala biti zvijezda dana.
Uz puno međimurskog šarma, topline i autoironije, autorica nas vodi u vrijeme kad su kumi morali doći „kak Bog zapoveda“, kad su se torte nosile s ponosom, a snalažljivost bila važnija od savršenog izgleda. Jer, na kraju krajeva – nije važno kak’ torta zgleda… važno je da je fina!

Nesam nekva pobožnjača, a imam joko puno kumici i kumići. Sedem pot sam krsna kuma, pet pot kuma na fermi i jempot na Mariji Bistrici- bistrička kuma. Ret je došel kaj se te moji kumiči ožene, i kumice didu zamuš. Jedne zdene zime pred tridesti ljet, svati so bilji v Malomu Bukofcu f Podravini. Zamuš je išla moja ljepa žlabrava kumica Jasna. Vuni veljki sneg i škljiski ljed. Špičaste ljedene sveče so viselje z zmržnjeni krovi dolji spram snežne zemlje.

Sprajlji smo se kak Bog zapoveda, ferminski kumi morajo biti spinđerani, zbigecani, preštimoni i ljepi. Moji losi nataperani na visoko pre selski frizerki, so sreča kaj imam joko goste losi pok njis ne tre brenati i na vikljere frkati. S pol flaše spreja za losi, polakerani kaj bodo stolji na trdo celji den, i do drugoga jutra. Kaj se na frizura poflopila. To joka duha laka me zadušala, gotila, kihala sam i brehala. Kompljet oprave, ajncug muški i ženski, kupljeni v Nagykanizsi, po našem Nočkanjiži. Mi Međimurci koji smo živelji bljizu mađarske međe, dobilji smo zeljene propusnice na miljiciji f Čakofcu. S tem smo moglji skorom saki den iti prek granice, nesmo moralji nositi pasoša. Mene so prekrstilji, mesto provoga mojega prezimena pisalo je Irma. Kak ljudi f kancelarijama črčkavo nečitko pišu, tak so mesto mojega prezimena napisalji drugač. Bilo mi je praf, ljepo je meti drugačko prezime, kak der bila bogota von lady. Irena von Irma.

Genulji smo z ganc novim Jugo autom do Dobrave, vozilji se po unda neklasificeranomo asfalteranomo poto kre hidroelektrane Dubrava, se do dobravske benzinske pumpe. Tu je zovoj od devedeset stupnji. Jo sam v rokoj, na glajžnoti taci, držola visoko scifrano torto na dvo kate. Sedela sam kak suvozoč, nopri. Kumi morajo na svate veljko torto donesti! V ono vreme krsni, ferminski i bistrički kumi so nosilji torte na svate, takof je bil običaj i red! To fino torto nam je pekla soseda Mara Korčijeva, ot četrnojst jajci filjano z orehi. Po gori je naljičila teško kremo ot kupljenoga margarina, pometala zeljenoga sparagusa za kinč i nekve ruse ružice koje je soma delala, cifrala i pekla. Napisala je z slastičorskom špricom ŽIVJELI MLADENCI. I den denes so živi, fola kaj pitate, dobro coprijo njim je kuharica hitila. Baš je bila ljepa torta, na bogatomo složena, sljine so nam išlje, mom bi jo jelji da smo smelji.

Na tomo dobravskomo zovojo šofer znogla zabrenza, zakoči, i gornji del torte posmica se do šoferšojbe! Komaj sam ga prijela kaj se ne zaljepil za glajžo auta. Moji prsti so se znogla zapičilji v mefko testo i belo kremo. Kaj bomo ve? Nemremo, mi ferminski kumi, dojti na svate bez torte!

Nekak steška smo gornjega kata torte zaljepilji nazoj na doljnji del, alji moji ščepci so naprajlji prela f testo i na filji. Kak ve to poravnati, kaj bo torta nazoj k nečemu zgljedala? Nemamo nikaj rovnoga pri sebi?!

Zelji smo ručnoga strugoča za ljeda i snega čistiti z gepeka auta i s tem poravnalji torto. Ukrasne kinč ružice smo nazoj poftikalji i zeljenoga sparagusa narivalji f prelje de so bilji trogi moji pet prsti. Došlji smo na svate, torta je bila na heljaj, kak der se deca igrala. Podrafčani so komenteralji, da Međimurci ne znajo ljepe torte speči. Važno da je bila fina!

Autorica: Irena Vičević

*********************************INTERMEZZO**********************************