Ftičeki se ženijo – VALENTINOVO
Pripovesti i pesmice so mi povedalji stori mojča Morta, rođeni v Dolnjemo Mihaljefco 1892. v Dvanajščakovi familjiji. Zamoš so dišlji f Kotoribo, kak šesnojst ljetna pucka, za dofca z jenim maljim dečecom, kemo je mater hmrla na porodu. Mojča Morta so živelji 98 ljet. Jo sam več bila zamužna dekla, zvršila sem srednjo školo i fakulteta, takve veljke školje kakve samo đak Grabancijoš ima zvučene. Samo trinojsto školo, za copranje, nesam zvršila! I nesam Pozoja z glaboke grabe vun stirala. Stareši so mi bronilji fest se vučiti, am se to jeni selski pucki ne šika. Verovalo se da se joči v šrek obrno, da postoneš šprljava, pamet ti se zmeša ot dogoga čitanja, a prsti zveriže ot fest pisanja.
Mojča Morta so puno državi prešlji, a zapraf so ostalji navek na istem mesti. Najdaljič so do Priloka na kolski zopregi dišlji i do Buzofca se z cugom otpeljalji; por pot v življenjo na kroski sejem. Živelji so f puno državi; do 1918. v Austro- Ugarski Monarhiji. Unda v Kraljevini Srba, Hrvata i Slovenaca od 1919. do 1941. ljeta. Do 1945. so nazoj bilji pod Mađarima. Poslje 2. Sveckoga rata živelji so v FNRJ Federativnoj Narodnoj Republiki Jugoslaviji, unda potlji toga v SFRJ Socijalističkoj Federativnoj Republiki Jugoslaviji. Nazodnje, pret smrt, dok so se svetomo Petro na sod ravnalji, pre postanka države Hrvacke, so hmrlji. Živelji so f pet državi, a nikam so zapraf ne dišlji z svega grunta.
*********************************INTERMEZZO**********************************
Dok sem bila joko mala, sakojočke huncvutarije so nam, drobni deci njivima pravnukima, preprovljalji i poškomač se z nas bedačeki norci, smejalji. Na Valentinovo so nas zron, čim smo otpralji krmežljive joči i migulje si hmilji v zdeni zdenčani vodi, poslalji na vrt. Još je bilo fest zima, namugalji so nas kaj pemo bosi. Toboš, dobilji bomo ganc nove, črljene čižmice. Da čižmice zabadav deljido na vrto!
Mi dvo poscanci, bratič Miro i jo, smo njim verovalji na reč. Još so nam mojča povedalji da se te den ftičeki ženijo, i da bomo na vrto našlji nekve slatke kolačeke koje so vrapčeki ostajlji poslje februarski ftičji svati. Žurilji smo se, bosonogi bežalji na vrt i v grmjo čulji sive vropce koji so veselo živkalji živ- živ- živ- žav! Skokalji so i prhetalji z vehe na vehu, s kite jorgovona na vekšu granu trnosljeka, nagonjalji se i popevalji. Našlji smo, obešene na belomo konco, por zdigani kolačeki, ke so zgljedalji kak prtuljetne ftičice.
Nišče na vrto je ne deljil črljene čižmice! Misljilji smo da smo predogo spalji, pok so čižmice mortik mojča zelji?! Veselji i srečni, bosi, dobežalji smo k mojči, gljedalji smo de so nam podlječilji naše črljene čižmice?! Mojča so se tak smejalji z nas, kaj so se po črnomu šurcu pocalji z rokomi. Pogljednite si noge- tu so vam črljene čižmice! Zmržnjene noge porinolji smo f toplo kohljo. Dok so nam se stopilje i odmrzlje, peklo je kak der nas nešče z tenjkim iglami pikal! Dobilji smo bolječe zonoftice. Ne velji se zabadav- da je ljubav BOL!
Autorica: Irena Vičević
