Fašnjak Fašnjak laže
Dok smo bilji deca, vrnačalji smo se z mihaljevske osnovne školje za Svetu Mariju. Radni den, tork. Nekvi dečki z vekši razredi so se bljeklji kak fašnjaki, delji si namolane lorfe na ljice i kroske zvinjene roglje na glovu. Ružilji so z željeznim maljim zvoncima, povezanima z svitnjakom kolji dogi hloč. Te žmefke hrđove zvonce so zelji f štalji, od morhe. V rokoj so držalji dogo drovsko šibo, naganjalji so nas i koga so doseglji, žegnolji so ga šibom po nogoj.
Mi školorci smo njim brbralji:
Fašnjak fašnjak laže, v riti so mo paže, benitaj!
Fašnjak, fašnjak laže, f pišku so mo paže, beži v doljnji kraj!
Fašnjak, fašnjak laže, v riti so mo paže, beži v gornji kraj!
*********************************INTERMEZZO**********************************
Maškarani, nalorfani dečki so begalji za nami, i koga so šibom doseglji, bormeš se čohljal po žegnutomu mestu!
Jen ot tejo strašni fašnjaki je nosil provoga kožnotoga korboča, biča zdelanoga ot bikove žilje, zapraf posušenoga i nategnjenoga bikovoga pimpeka.
S tem strašnem korbočom je pocal po zemlji, znogla potegel, tak brzo kak dok avijon probije zvučni zid, i s tem nas još strašneše besil.
Mi deca, delji smo žmefke školske taške na jen kup kre parka, i naganjalji se z fašnjakima. Baš je to bila ljepa igra, prvo smo bežalji v doljnji kraj, unda f centar sela, pok naspram cirkve v gornji kraj.
Mojega pajdoša Štefeka stisnulo je vutemtoga, srat. Dok smo se kak deca si skup igralji, navek si mel jenoga posebnoga pajdoša ilji pajdašicu, koj je bil kre tebe i za tebe, i ti za njega za bilo kakvo pomoč. Druga deca so bila malo ljubomorna na pajdašiju. Ak je nekoga pritisnolo na sranje ilji je moral iti cukat- scot, dišel je f prvi grm. Gače dolji, a pajdoš te čakal sa strone i držal strožu. Ona ljubomorna deca so vikala njemu da je dreku kum! Tak si je pajdoš Štefek počepnul, spustil hlače i gače, i obajel svoje. Štefek i drečni kum so ne gljedalji na se stroni, am so melji važnešega posla za obovljati! Drečni kum je iskal suho ljistje za rit zbrisati! Odjempot se podel zakrabuljeni fašnjak i Štefeka žegnul z dogom šibom po golji riti!
I još je viknul: „Kaj boš ti meni brbral; fašnjak fašnjak laže, v riti so mo paže!
Autorica: Irena Vičević
