Februar – močki se tiraju

Cigu legu megu, močki su na bregu, a hiža je v dolu, drek ti je na stolu!
Celo bogovetno noč dosadni močki so mrnjofkali negdi na sosedovomo krovo, zapraf se prvo sivi veljki moček svadil i s capama tokel menšega žotoga muškoga mačkeca. To so bilji takvi strašni glosi; čulo se kak se zapuhani nagonjajo, jen drugoga srdito gljedido, frkčo z kosmotim mustočima i fajtnim gopcima, sikčo kak otrovna kača jen na drugoga, ljupljo se z fljetnim capama i dropljo z špičastim škrompljima, i steklo bobnjajo po pljehnotomo krovo ot naše niske garaže. Unda je slabeši zgubil bitku i kak rezdropljeni ranjenik potuljeno pobegel. Dol je petama vetra, tak se narodski velji. Črljena temna krf mo je čvopala po naši verondi, zamusikane namočene dlake i del zguljene kože zaljepil se na pofrojhani zid. Pobednik, gizdovi sivi moček, se slavodobitno poscal po sakem voglo rovnoga garažnoga krova i hiže, i tak markeral svojega ljubavnoga placa. Potem so močke- ženke z celje vuljice počelje fest, na glos tuljiti! Zavijati kak der se nefkretna drobna deca bečala! Probajte ve zaspati! Debeloglovi moček pobednik, z veljkim jajcima med zodnjim nogomi, skočil je na pljehnoti žljeb i dosmical se dolji na zemljo, de ga je sosedova ljepa črno bela močka željno čokala. I tak do jutra neje bilo mira. Skečanje, jofkanje, frktanje i bečanje.

*********************************INTERMEZZO**********************************

Se to ne bi bilo Bog zno kaj, der i mi nej melji žensko močko v hiži. Njo smo, bogico, dolji sterilizerati, alji je tak tožno mrnjofkala dok je čula ljubavne pesme zvuna, kaj nam se srce na pol cepalo. Po istini, to je ne pravica, živomu stvoru družbenika fkrotiti!
Komaj smo pred jutro na miru zaspalji, no unda pok je vura zazvonila. Zapraf pesma z mobitela. Tre je iti na posel. Naši japica so govorilji (Bog njim dušu zveličaj): „Što ima v riti prelo, mora iti na delo!“ Tak je bilo negda, ostalo je tak i ve.

Hmiješ se, zobe opereš, blječeš i drito vun s hiže. Samo kaj je naša hižna močka druge nomere mela. Mi smo njoj uskrotilji ljubav, a ona se ftruc posrala pret ganjčenim vrotima! Što je prvi išel vun s hiže, nagazil je na minu…kaj je dalje bilo, nam vam rekla. Zapraf, stori ljudi veljidu da je sreča dok se v drek stone!
P.S. Samo baš ljepo ne diši.

Autorica: Irena Vičević