Badnjak

Prvo čega se zmisljim dok sam bila čistam mala, zapraf prvo prfcato čega se zmisljim z svojega življenja, je zima 1969. Badnjak. Mela sem štiri ljete, a moji roditelji so za Vuzem odišlji delat v Nemačko, kak gastarbajteri. Mene so ostajlji pre japici Štefijo i mamici Mari Sabolječki, na čuvanjo. Tati i mama so za teh devet meseci, od Vuzma do Božića, poslalji jeno korto, razgljednico s cvetjem na prvi stroni. Na drugi stroni, de se piše, je bila ljepa poštarska markica, a na njoj je bilo označeno 1 DM (Deutsche Mark), i podogovoti štambilj zemlje Deutschland. Na korti so napisalji por reči: Dragi naši, dobro smo došlji, na carini neso našlji cigaretljine. Delamo po celje dneve i peneze sljužimo. Mi smo dobro, kaj i vam želimo. Brza jela, zeljen bor, pišite nam brzo odgovor! I potpis: Vaši Slovi i Kata

To je bilo se kaj je stalo na to korto, celji život tejo devet meseci. F selji vu to vreme, nišče je ne mel teljefona. Mogel si teljefonerati z pošte na drumu, alji to je bilo joko drogo, fest penez je koštalo. Poštarica Malčika je nutri delala, a poštar Volji z muškim becikljinom sako rono jutro hol na štecjon po pošto.
So sreča kaj još nesem znola čitati, v deteči glovi sam si delala pripovesti i zamišljuvala da moji roditelji žividu v bogotomo dvorcu na bregu, da tati vozi Mercedesa avta, a mama je moderna švelja. Zapraf je bilo čistam drugač: tati je po vročemo ljeto i po zdeni zimi, na gradiljištima kormonil z visokim kranom, a mama je šivala samo rokove kaputi i baljedi, za bogote germance. Celji den jen te isti posel, nega tu bilo nikve kreativnosti, roka jo je boljela kak je stolno istoga posla delala. Po sobotama i v nedeljo v jutro so delalji pre Hitljero, zapraf se te gazda prezival Hiller. Alj je pre Drugoga sveckoga rata mel Adolfovo prezime, pok ga je premenil? To namo nigdor zeznalji! Poljoprivredno gazdinstvo, de so moji roditelji, i drugi Međimurci i Zagorci, kopalji kolji bori, kosilji trovo i zobačilji, a održovalji so i zeljene place po celomo grodo Stuttgartu. Bil je to joki industrijski grod, centar proizvodnje kvaljitetni nemački auti.
Te penezi kaj so roditelji zasljužilji pre vrtlaro, bilji so njim za stanarinu i za hrono. One dojč marke zasljužene f tvornici i na baušteli se pošiljalo dimo, kaj se nova hiža naproji i zaziđe vekša štala za morho. Teh ljet, roditelji neso vljeklji sebom svojo malo deco. Što bi njis tam čuval i pazil?

Tak sam jo zamišljala da so moji stareši, zapraf bogotoši! Da se imajo i da njim čistam ničesa ne falji. Neso znalji nemački, vuno vreme se prinas f školji vučilo samo ruski. Mama je z sosedom Štefom Danjenovom došla v nemačku zadrugu, kupiti šibice. Neso znalje reč za to, trgovine so bilje starinske, moral si trgofki reči kaj očeš. Neje nit tam bilo samoposlugi. Z rokama so potezalje kak da vužižu šibicu, pokazuvalje kak der kadilje cigaretljina. Kak der se pantomimu igralje. Komaj je trgofka razmela, zela šibice cpot puljta i prodala njim.

Te Badnjak, 1969. zdene zime, moji roditelji so došlji v rodni kraj. Dopeljalji so njis vidovski Gabaji z avtom, moji još neso melji peneze kaj si ga somi kupiju. Potuvalji so skorom celo noč i den, na graničnim međama je bila gužva kak stekla. Puno vur se čakalo kaj pregljedajo pasoša, i pretepejo avta. Nešterni ljudi so po poto strodalji, neso bilji nafčeni na tak dalko vožnjo, a bormeš so nit ne bilji nekvi šoferi. Zmočeni, mom poslje posla so krenolji, kaj čim pre dojdo f svoj rodni kraj, Međimorje!
Dok so roditelji došlji, putne torbe i jenoga sivoga kufra so delji poljek hižni vroti, i dišlji zmočeni spot. Kopala sam po torbi, našla kilne sviljene cukore za bor kinčiti i dnesla njis na vuljicu, podeljiti svojima pajdašicama i pajdošima.

Moji so joko dogo spolji, misljila sam si kaj so opče dimo došlji, am so si moglji počivati i tam de delajo!
Japica so otpiljilji i doneslji jeno kito zeljenoga bora z vrta, i delji njo na zid. Mamica so kinčilji borovo veho z por kroglji glajžnoti kugljici, koje so bilje zamotane f plotno kaj se nej spotrlje, i omotalji srebrnoga kinča kega so somi zdelalji. Bljeklji so jesenske rehe f srebrni paper, ke je bil nutri v škatuljki cigaretljini. Po obloko so nametalji črljene drobne jaboke. Dok je zvonilo Zdravo Marijo z cirkvenoga turnja, v hiži se pogasilo svetlo. Japica so doneslji zlotno slamo i položilji pot malji stol. Pokljeknulji smo si i moljilji. Deca so vuni popevala: “Marija se, Majka trudi, svetoga Jožefa budi. Stal se Jožef, izvečera, ophodil je Betlehema. Betlem varoš bil bogoti, stona neje mogel dati. Zvun varoša, na pol vure, de pastiri jognja kure. Tam so bila prozna jasla, moršica se vuni pasla. Nega stolca, nit stolice, sednite si na slamice. Kirie eleison, Ele leison, Isus se rodil u štalici, pojte pastiri, tamo se njemu poklonite! Pođite kralji, tamo se njemu poklonite!

Mirni Badnjak Vam sema skup želim!

Autorica: Irena Vičević

*********************************INTERMEZZO**********************************