Traktor

Moji roditelji su se vrnulji z gastarbajterstva, poslje sedem ljet dela v Nemački. Tati je mom prodal ljepu črnu, žmefku međimursku hladnokrvnu kobilu Vranku, stori mojča so se rasplakalji, kaj njivu družbenicu samo tak z ljefka prodoje. Tati je dodal fajn penez i kupil novoga medveda! Zapraf je to ne bil provi medved, samo se te traktor tak zvol. Ursus, kaj latinski znači medved! Ursus C355. Vu to vreme, 1977. ljeta, ljudi so terha i voze vljeklji z potkuvanim kravama, a nekoji s pametnim kobilama. Mi smo melji traktora!

Mama je ne štela voziti, pok je tati mene vučil. Jedenojst ljetno pucko. Prvo sam vozila ot stajce korzinja do druge stajce, v prvi brzini. Roditelji su korzinje hitalji na prikoljicu, snope povezane s šibnotom gožvom. Dok smo došlji do kraja zemlje, korzinje sam morala peljati dimo. Tati je rekel da je to čistam ljefko, peljam rovno do sela, nikam nit ljevo nit desno, nit hojc nit cuj, samo hitim vu vekšu brzinu, a postati sam znola. Stori mojča i tetec Droši bodo na gruntu, domaj, čakalji kaj zmečo voza i naproje posret grunta nove stajce korzinja.

Roditelji so z becikljini dišlji od dalke Mezove, skorom kre Kotoribe, brot koruzo na drugo polje, na zemljo zvono Vitomerce. Tam so došlji Tane, tatijev pajdoš s posla, i njegva žena Dora, pok so red po red, bralji, trgalji loti koruze i nametalji njis v hudične plofte povezane ljudima beročima kolji plječa i vrota. To plofta je znola biti tak žmefka, puna zrelje žote koruze, kaj je rezala za radnička plječa i ostovljala črljenoga troga. Dok se plofta napunila, zmetalji so koruzu na jen kup. Saki beroč je tiral jenoga reda.

Jo sam za to vreme vozila medveda, zapraf Ursus traktora f selo. Komaj sam z nogom dosegla kuplunga, tak trdoga kaj sam morala som težinom nagaziti i prijeti se za kroglji volan. Unda z prve brzine hititi v drugu, a te medved je mel i među brzine. Se skup deset brzini, pet v normalni vožnji, i pet v reduktoru! Ve se pitate kaj je reduktor? E, traktor je radni poljoprivredni stroj, znači more orati, pljužiti, tanjurati, kositi, vlječi koje-kaj i delati žmefke poslje. Za to ga morate deti v spori hod, zapraf reduktor. Unda ide pomalji, ore ljepe rovne rede i se dela mudno kak der pož lazil. Tak sam jo došla do polja Željeznice, zapraf željezničke štreke. Tu je trebalo postati, kaj me nej cug, z Kotoribe ilji z drugoga smera z Donjega Kroljefca, zgazil. Dok sam menjala brzinu, nekak sam, čistam slučajno, hitila traktora medveda v reduktor. V prvu reduktorsku, nejmudnešu brzinu. Krene on, cukne i prejdemo štreko, čelične šinje i drvene šveljere. Tiram medveda, dodovljem gasa, a on lozi pomalji, pok pomalji. Močim se, očem ga hititi f prove fljetneše brzine, alji mi nejde pok nejde! Preveč trdoga kuplunga je mel, a moja dečja težina neje bila dost kaj ga drugam genem! Tak se jo vlječem kak sljinavi pož po poljskomo poto, odzoj mene foringoš Marđetko z vrhom biča fčehne kobilu Surku po sapima, ona zahrže i preteče me. Mohala sam čoveko kaj stone, kaj mi pomore. On se obrnol z glovom, neje razmel kaj vičem i z rokomi mu kriljim! Misljil je da ga pozdrovljam! Od glasnoga brncanja mojega mudnoga traktora, ništ se ne razmelo. Na glos mi se čovek norca naprajel i doviknul mi, da je njegva Surka z jenom konjskom snogom fljetneša od moji deset!

Tak se jo dalje pomalji vlječem do Veljkoga mosta de teče potok Bistrec. Dostigla me odzoj kroska zaprega. Taradi i njegva žena vljeklji so na vozo pozobočeno ljistje, za štolski nostolj. Pre sela, i cifrana krava me pretekla! Čovek foringoš me zbelno gljedi, žena mi kljima z glovom, simentalska potkuvana krava muče, i posere se po poto! Smeje mi se kak me pretekla! Mene, i traktora Ursusa-debeloga medveda! Mošem čoveko kaj mi pomore, vičem, alji od njega ništ! Bil je vesel kaj je dišel nopri od mene!

Traktorski prvi menši kotoči nagazilji so na kroski drek i se je po meni ljetelo, jer Ursus je ne mel blatobrane na prvi kotoči!
Nekak sam se, poslje jene vure peljanja v reduktor brzini, dovljekla dimo. Tetec Droši so mi pokozalji kak se medved tira, zapraf kak se z reduktora dene v prove brzine. Proznu prikoljicu sam potlji peljala na polje Vitomerce, zemljo mom poslje potoka Rakovnice. Beroči koruze so me čakalji, pobralji so se rede. Tati je pital, de sam tak dogo? Kaj se z menom pripetilo? Rekla sam da je traktor bil neposljušen, a z bičom sam ga ne mogla fčehnuti!

Autorica: Irena Vičević

*********************************INTERMEZZO**********************************