Kvos i peemes

Neznam opče kak sam se našla vu Varaždino pre onim veljkim štacunima. Vište ve kak so me razmonterali! No, pak ve ak sam več tu bom malo hitila joko kaj na sam rit pota vidla.

Je mej ništ ne tre ali ova pucka štera čižme trži veli ak kupiš dvoje ove jane so skorom pak zabadaf. Bi jo kupila srčeko jane ali kaj, otkod jo znom ali mo bojo pasale!? Tak sam onda, kaj bo sigorno, zela sej bedvoje. I sam kaj bote znali, dobro je kaj sam išla vu štacun jer sam zagledala kaputa točno takvoga kak si več deset let želim! I kaj ve, sam mortik trebala glovo fkrej brnoti? To očete reči? Deset let ga iščem! Normalno kaj je išel z menom dimo.
Me je onda malo onak grizlo vo duši pak sam si mislila si pojem šteroga koloča pak kupim i drugima nekaj kaj najo gombali.

Potlji dve kremšnite i kove sam spozila tam prek, znote vo onom Mulero, se na pol cene! Viš ti to!? Kakvo jo srečo imam! Srčeko navek gomba kaj si te skope mošče kupujem a ve..sigorno bo srečen kaj sam tak potrefila. Am je se skorom pak zabadaf! No, sam i njemo kupila jedno milko čokolodo ali sam se potlji zmislila da on neče te z keksima pak sam jo onda pojela. Kaj na bogec tožen!

Bi jo ve sigorno išla dimo ali ve, imam kaputa, imam čižme…išče jana kiklja kcoj jer kaj, nam valjda gola cpot! Je tak?
I ve, nikak ali nikak odebrati med tri štere so mi bile baš onak fajn, pak je trgovka (joko spametna pucka), rekla da kaj si nej zela se tri ak mi več tak pašejo kaj da so na mej šivane! Pak, ima puca praf! Kaj bi si jo stresa delala. To škodi na želodec.

Tak, dem jo dimo i da sam zišla z avta zadeši mi nekaj po buftlinima!
O da ti sveca! Kvos! Lepo bormeš! Mene pošiljajo tijam vo Varaždin po jenoga kvosa a prafzapraf ga domaj skrivljejo od mene! Pak je to svet ne videl! Som bog kaj sam jim ništ ne kupila! Neso si niti zasljužili!
Nej me samo što kaj pita!!!

Suzana Martinuš

*********************************INTERMEZZO**********************************