Jantonovo

Antunovo i zadnji škole – ide li to zajedno objasnila nam je Irena Vičević u svom humorističnom prisjećanju za projekt  “Nisam danguba, samo stvaram povijest!”. Smijanje vam ne gine!

Došel je kraj školje, trinojsti junijuš stori veljido, a mlodi zovo lipanj mesec da lipe cvetejo i cela vuljica fest diši. Ovo ljeto je Jantonovo palo točno na petek, zodnji den našega vučenja i još k tomo veljko proščenje!

Cela vuljica kolji store školske zgrade je puna pisani štanti i belji šatori, kromari trže norci kupuju- tak veljido naši mojčica. Tu so sake felje jočki štanti z zlotnim, dogim loncekima i srebrnim prstenima, krogljim ringljinima na čipkaste ružice za prepičena vuha i na pljehnote kljipse, debelje narukvice koje idu na sako roko, sakojočki priveski za školske torbe i svetešnje jakne. Sega jega kaj ti srce želji i duša išče, fal, za drobne peneze, skorom pok zabadaf!

Tu je belji šator z širokim stoljima i drvenim klopami de svetešnje blječeni ljudi piju zdenoga gverca z glajžnoti kufici, de je nutri pol ljeda- pol medene, slatke pijače.

Denes so me ljepo sprajlji f školo, nedeljna oprava je na meni, a gori imam blječeno plovo kuto z dvo žepe. Ret je ret! Kak se šika na veljki, cirkveni, zapovedani svetek. Tak se f školo ide, si isto blječeni. Prvi dvo sati so brzo prešlji i poslje toga je bil veljki odmor. Glasno zvonce zbornice je zazvonilo, si smo stalji v red v ganjko do školske kuhnje. Denes smo jelji samo belo kovo, kojo nam je kuharica Dora natočila v cinani lonček, k tomo krojca kruha kojega smo nuter nadrobiljii i ništ drugo. Tejo dvajsti minot veljkoga odmora smo mi đaki koje-kaj fteglji.

Nesmo smelji čez glavna ulazna vrota ziti vun samo tak, na proščenje. A štečalji smo, nejrajši bi pobeglji, a nesmo smelji! Dobilji bi s tenjkom šibom po rokoj, packe ot učiteljice, kaj se se prošilo! Školski pajdoš Miha, koj je mel nejdokše noge v razredo, doge kak pondeljek se velji, skočil je čez oblok na vuljicu. Njegvi so delalji vuni kak Gastarbajteri, pok je navek bil peneznoti i saki den je dobil nekve drobne banke na strošek, a neje bil skoporitnjak i škrtec. Tak se on poškljiznol dolji čez oblok, zapraf se samo po riti z nogomi spustil na šuder, školska zgrada je joko niska mom do vuljice. Dbežal je do šatora z gvercom i donesel nam jenoga glajžnotoga krigljina punoga slatke pijače. Si smo se trucalji, naljevalji si f požeroke direkt z krigljina, obljizovalji se kak šteči močki, koj-koj se poljejal po rokoj- unda si je ljepljive ščepce ljizal i nofte cmukal. Tak smo požrljivo ftek pilji i se spilji, celoga ljitra, a učiteljice je još ne bilo v razred. I ona si je podokšala veljkoga odmora. Itak je zodnji den školje, ocjene so zaokružene, zaključene, pok se i one slobono spominajo malo dože v zbornici na krojo školskoga ganjka.

Dok smo jenoga ljitra spilji, bilo nam je joko fino, f čerevo nam je burkalo i frfralo, pok smo štelji još. Zbralji smo se drobne peneze, kaj je koj od nas mel sebom za strošek i delji na jen kup. Unda se Pipi raskurožil i on skočil čez oblok po novoga gverca. Medičar Lukša z Vidofca mo je natrl debeloga ljeda z sekirom i nametal te kocke ljeda v dvo krigljine, gori na to natočil je ljepljivoga finoga gverca. Pok smo se natakalji i pilji, a nam deci bilo je malo dost kaj se napijemo kak provi pijonci. Jeziki so nam se zapljetalji, hehljalji smo se i bedastoče speljovalji, smejalji se i popevalji. Dok je ozbiljna učiteljica došla v razred, mela je kaj za videti! Pustila nas je dimo; am kaj bo mela z maljim norcima posla. Komaj smo se na becikljinima peljalji, gume so nam f šrek išlje. Se peneze smo potrošilji na gverc, ništ nam je ne ostalo, nit kaj si kupimo lonceka, medeno bobico, konjeka ilji črljeno srce z zrcalom! A net za ringišpil!

I ve, poslje pedeset ljet se zmisljimo glajžnotoga vrčka i den denes nam v riti frčka!

*********************************INTERMEZZO**********************************