Hlapsljin

U sklopu natječaja “Nisam danguba, samo stvaram povijest!” stiže nam još jedan dragulj iz djetinjstva – priča Irene Vičević vodi nas u dane kada su obaveze letjele brže od nogu, kokoši kvocale kao sudbine, a guma za skakanje bila svetinja… dok se nije srela s hlapsljinom. Pripremite se na dozu smijeha, šoka i onog poznatog: “Točno tako je bilo!”
👇 Uronite u živopisni svijet malih nestašluka i velikih batina!

Kam gojt je bilo tre iti po nekvomo poslo, jo sem bila glavni nabavni. Mojča Franca so se zmisljilji da nemamo niti jeno jajce pre hiži, a tre so njim kaj zamese žotoga, domočega rezanca i narežo kockaste krpice za mladinsko juho. Dve golovrate kvočke so kvocalje i sedelje na gnjezdi, mladičke piščenjke neso još preneslje, a tri store pergane kokoši so se sfurdalje. Tak smo bilji najgerik z jajcima, komaj so dve friške jajce strojbalji v jutro za zojtrek, zmešalji z belom oštrom meljom, kroskim mljekom i mlodim ljukom z maloga vrčoka i se fljetno speklji na dišeči sloni kosani mošči. No, tak so me poslalji k sosedi Trezi Kedmenčevi, kaj pem posoditi jajce.

Fljetno sem bežola, kaj so me noge vrit ljupalje, pajdašica Ika me več čokala kaj bomo skup skokalje na gumo elastiko. Unda se tati zmisljil da tre iti k Baričevomo kumo Motijo i dobri kumi Gelji, na drum, po našega hobljiča kaj njim je prošlji tjeden posodil, a ve mo baš tre. I to sem z voljom zbojla i so srečna se, fljetno vrnula dimo na grunt.

No, undapok so se japica zmisljilji da tre iti f krčmo po Ibar cigaretljine bez filtera. Nek njim bo, rado sem bežola po to jer so mi saki pot dolji na strošek za kaštuljko žvakači cigaretljini. Po tem očem pobeči s pajdašicom, ve pok teta Marica čez otprti oblok viče kaj pem v zadrugo po kvosa za pet banki, tre njoj kaj zamesi zdigane koloče filjane z rehi. No, i to sem naprojla fljetno, teta mi je dola kaj si kupim cukore pecto pet s crtom, koje mi je štacunor Logovec vagnul por deki v paperni škrnecljin. Komaj jempot sem se zbovila. Ve se morem v miru igrati do trde noči!

Kajpok, der bi tak bilo kak sem si jo namisljila i splanerala. Mama z prve hiže viče nek prepozim mlajšo sestro, to malo bečalo i posmetalo. Dela njo je v dečja koljica z veljkim kotočima i nek jo, jo, vozim po grambljavem poto! Vutemtoga je išla foringa, črna kobila Vranka je vljekla voza suhoga, dišečega sena po prašni vuljici. Stori foringoš se zastajel pre našemo šibnotomo ploto i zaspominal se z japicom, poljitiko so tiralji.

Ika i jo smo se štelje igrati, a ne to šmrkljivo poscaljugo, malo cendravico paziti. Zelje smo dogo špogo v zdeni pelnici i zavezalje visoka deča koljica za svoro odzoj kolji. Nek se dete vozi, kaj jo namo mi moralje čuvati. Odišlje smo skokat na gumo. Japica i tetec Droši foringoš spilji so zdenoga črnjoka, saki po punu glajžnotu kuficu i dogo se spominalji, malo so se potregmalji kolji nekvoga krogloga loba i nedeljne utakmice za Jadanom. Još so si jene spilji kaj se pomire i na krojo štamprljin žganice kaj si spero proha z požeroki. Vredni foringoš tetec Droši so skočilji na šibnoti, plječeni sic i potiralji črno kobilo. Vranka je znogla povljekla, dok so tetec z vojkami ljupilji po njezinomo širokomo hrpto i na glos viknulji: he Vranka, hojc-cuj! Kak je žmefka Vranka fest cuknula, tak so se deteča koljica prevrnola, puckica se zvrnola na prašnati pot i počela se fest bečati. Japici je glajžnota kufico z črnjokom tudumom pola z rok. Skorom so se zahljiknulji!

Galženjaki jeni, vrok steklji je vu vas vušel! Vikalji so mojča, mama se križala i rekla zbešnjeno: za pet ran Kristuševi, moglje ste dete zatoči, tati je pene kosal i poslal me po hlapsljina f pelnico. Neje nas bil z svojim hločnjakom, da bi ga vun spuknol bi mo hlače dolji palje!
Bormeš so nam debelji šmrklji curelji i slone soze teklje dok smo z kožnotim hlapsljinom po nogoj dobilje, tak fest kaj so se čurke poznalje još por dni! Tak smo bilje bite, kaj i den denes to pomljamo. Nikve huncvutarije i norije so nam več ne na pamet pađalje. Gumo po koji smo štelje skokati, mama je zrezala i napeljala v japine gače.

Hlapsljin- široki kožnoti remen za brusiti kolinjske nože
Hlapsljin- odgojna metoda za hmonjo deco
Svora- zodnji del odzoj kola