Ilustracija: Goran Radiković

Betežnički dnevnik

Zgrešil sam! Priznam! I kaj je još huje, pred ženom sam moral priznati! Greh i mom pokora! Zvečera na Velki petek sam več ne mogel zdržati. Pak mi je sam v drobu fučkalo po taj ribaj i grah šaloti. E, što je to zmislil?! Pak sam si narezal SAM PET šniti jegera. I to tenkih. I dvo kruhe. I malo mlodoga luka, šteri mi je ne baš najbole sel. Ne bi žena niti znala, da sam ne još šaku i pol cvirki kosal dok se skozala v kuhji. Znal sam da sam zgrešil. I ona mi je to mom dola do znanja!

I kak takše stvori pri meni završijo? V pondelek sam lepo zbetežal. Takša zimica me trosila, kaj sam do kupaone skorom gače zgubil. Kazna po meri! Ono čega se najbole bojim! Betega! Sel sam si na šekret i del toplomera pod miško. Da me skorom božja strela fčehnula! Trdestisedem sa dvo! Za nas kače i kuščare šteri inače imamo jedva trdestišest, to je več joko zabrinjavajuče. Znal sam da bi mi Božek črez prste pregledal por šnitici jegera, ali cvirki so preljali kupico. Je, kaj, moram povedati gospođi kak stojijo stvori.

Evo me v moji negdašnji sobi od dvanojst kvadrati, iskoristivoga neto prostora dvo cjela šezdesetidevet kvadrati. Ve sam več ne na trdestisedem sa dvo, neg trdestidevet! Ve i onak moram ležati v kreveto, pa mi nikaj ne smeta kaj morem sam pod vinklinom koli kreveta hoditi.

Jo sam si v glovi ne to zamislil, kakti bomo rekli karanteno (REŠT!), neg kakti priliko kaj dobro premislim o nešterim svojim postupkima. Tak je moja žena rekla, a jo se složem! Dobil sam i upute Kučnog stožera, a po pitanju čistoče, prehrane i zobave:

  • Vum z sobe nesmem!
  • Ako moram iti vum, moram se z mobitelom najoviti i počakati odobrenje Kučnog stožera. Oni negda ne čujejo mobitela, pa se jo skorom poščim.
  • Dok idem vum, moram si zeti:

a) SVOJEGA brisoča za roke ili onoga temnoga za… no!
b) ftrči dvo papernate brisoče, jednoga zateknoti za pojas, drugoga našpricati z onom žganicom
c) brnjico na gobec

  • Z našpricanim brisočom prvo brišem kvako znutra, pa kvako zvuna, pa z brisočom vužgem svetlo, ali ako idem po dnevo onda svetlo NESMEM vužgati, jer moram paziti na svoj karbonski otisek (nabo se Zemla soma spasila, ako jo mi namo!). Žurim se v kupaono i probam ne sopiti po ganjku, z brisočom zdižem i SPUŠČAM desko ako je broj jeden (to nesmem nikak pozobiti!), a ako je broj dvo, onda z žganicom špricam desko prije i posle. Sam nesmim zobiti jo zbrisati prije neg se sednem, jer me zodnji pot skorom vrog zel da sam se na mrzlo sel.
  • Hitim korištenoga papernatoga brisoča v smetje i operem roke z tekočim sopunom. Strogo zabronjeno koristiti trdoga sopuna, jer je to nekši fini i drogi z šterim se gospođa hmivle prije neg si leže spot.
  • Z nekšom malo drugačešom žganicom špricam papera šteri je bil za pojasom i ve ide se isto ali v rikverc. Prije neg zidem vum, otprem širom obloka i za petnojst minot moram joviti kaj ga nešči zapre.
  • Jesti bom dobil kak i saki den, nebo se za mene nikaj ekstra skuhovalo. Tajer i escajg bodo deti pred vrota i onda si jo zemem v sobo. Da zgotovim, tajera porinem vum pred vrota.

Išel sam denes na test za to kinesko gripo. Ne bi inače niti moral iti, jer mislim da jo imam. Celi den mi se jejo nekše gođi bobice, a niti neznam kaj to je praf za praf. Misim da to šišmišovi geni vu meni delajo.

Bilo je jedno dvejezere ljudi, pa se malo čokalo. Da sam dimo išel bormeš se srež nome prijal. Inače jedna fina, mloda gospođa mi je zela bris lubanje, pa sam se posle toga v prvi moh ne mogel zmisliti niti kak se zovem niti kuliko sam star da so me pitali. Čak sam i jedno pol kilometra dišel v krivo stron, no onda so mi se od sreža možđoni reseterali, pa sam došel srečno dimo. V mojo slobodico. V sobo. Inače, javili so mi da od teh dvejezere, valjda sam samo jo negativen. Nigdar sam ne bil kak druga deca.

Denes me baš bolela glova, a moj sosed prek pota je prvo dve vozi drv z motorkom nažogal, a ve trčke kola. Bil sam navečer inače i pre svoji doktorici, pak je rekla da me Božek kaštigal z anginom i to nekšom grdom (videl sam kak se naprajla i prek brnjice!).

Za obed sam dobil onu španjolsko mrzlo juho gazpačo. No, praf za praf je bila topla juha, samo sam jo zadremal da je sosed postol cepati i dišel na obed, a nišči mi je ne poružil po vroti, pa sam onda moral pojesti zdeno juho. Bilo je zoto i nekaj mesa, kaša i zelena šalota, no tak mi se jan hip zaletelo, kaj sam mislil da bodo me nompak morali bročati.

Za zobavo sam dobil knjigo. Nema televizora, mobitela dobim tek posle četiri vure popolne, jer žena ga treba za posel (nebremo se si zležovati!). Knjiga je o američkomo građanskomo rato. Močil sam se čitati jedno trdesti strani, pa sam pital ženo odkud joj knjiga. Veli da jo je dobila gratis, ali se ve ne zmisli jeli bila na proho za peči koloče ili na proho za prati veša. Ve dok si malo premislim, ovi zodnji kiflini štere je spekla, so se nekak čudno belo prošili…

Autor i ilustracija: Goran Radiković

 

*********************************INTERMEZZO**********************************

Svakodnevne priče, ubojstvo i seks

Dozvoljeno je dijeljenje i kopiranje sadržaja ovog portala na druge portale, stranice ili blogove, uz obavezno navođenje izvora.

Odgovori

Ova web-stranica koristi Akismet za zaštitu protiv spama. Saznajte kako se obrađuju podaci komentara.