Žoti losi

🎤 BLONDIE V ČAKOFCU: Kad tempera zamenja farbu, a san o Debbie Harry skonča f žutom fleku 🎸
👉 Klikni i saznaj zakaj je tempere bolje držati v pernici, a ne na glavi!
Nova humoreska Irene Vičević za projekt ”Nisam danguba, samo stvaram povijest”!

Negda zdonja, jezero devecto osemdeset prvoga ljeta, hodala sem v srednjo školo f Čakovec. Srednjoškolski centar, denes Gimnazija Josipa Slavenskog, je niska zgrada bljizu Glavnoga kolodvora, dogoga storoga štacijona. Mi vredni đaki, srednjoškolci putniki, putuvalji smo z starinskim cugom koj je pafkal, čoril i fučkal tijam ot Kotoribe, Donjega Mihaljefca, Kroljefca- Priloka, Čehovca, Malje Sobotice do Buzovca i Čakofca. V rono jutro smo se budilji, dok so rugani pefci još trdo spolji i z muškim becikljinom pravac stanica.

Vu to vreme bila je popularna grupa Blondie i njiva ljepa frontmenka, svetlo losa američka pevačica Debbie Harry. Moj idol, štela sem zgljedati kak ona, a roditelji so bilji strogi i neso dolji kaj si poforbam moje temno hrđove losi na svetlješe. Mama je glasno i jasno rekla da mi ot kemikaljiji bodo losi otpalji, da bom od mlada čelava, kaj nam pelde ot sebe delala i kaj bodo sosedi misljilji da sem z pameti zišla!? Ozbiljen tati je otkomenteral nek na delo idem, a ne kaj hurmastoče povedam, da moja favorite pevačica kak jopica skoče i kaj se to jeni dekljini šika!? Nek si to z tintare vun zbijem ilji me bo on po nogoj z hlapslinom remenom k pameti dotiral!

No, jo se ne dam, kaj sem si v mlodi trdi glovi tintari zamisljila, to sem naprojla. Ne morajo oni znati da bom si jo losi posvetljila. Dela sem si tubico žote tempere f školsko torbo i dok sem došla na selski štecijon, naljičila sem si šiške i dvo pramene hrđovi losi. Friz je zgljedal praf svecki, rockerski, američki! Pravila sem se i soma sej bila važna i drugačka. Nomera mi je bila takva, poforbana, iti f školo, a poslje si ljefko na pumpi na željeznički stanici operem forbo i dimo dojdem kak dobra, mirna i posljušna dekljica.

Dok smo se dopeljalji do Čakofca, poskokalji smo z cuga dolji i po voski stezici kre zeljene ograde hodalji do školje. Pomalji je počel dešč cureti, škrapal je po meni, nesmo melji jembrela net kabanice za dežđovito vreme, glova mi se namočila, žota tempera se cedila z fajtni losi po mojemo golomo vroto i po čisti opravi. Dok sem došla v razred, si so se smejalji z mene, srdilji me i zafrkovalji, hitalji so se ot smeha! Zgljedala sem kak der me ne jen vrobec posral po glovi, nek kak der me celo jato črni vrani pokenjalo i sračko po meni pustilo!

*********************************INTERMEZZO**********************************