Smrdiš kak futač
Kad veterinarska tehničarka krene na teren, nikad ne zna hoće li završiti s injekcijom u ruci ili nogom u gnojščici. U svojoj humoreski, poslanoj u sklopu projekta “Nisam danguba, samo stvaram povijest!”, Irena Vičević donosi pravu ljetnu zgodu s futačima, tovljenicima i betonskim poklopcem koji ne oprašta.
Smijeh zagarantiran, smrad – na vašu sreću – ostaje samo u priči.
Kak stopram diplomirano veternorko poslalji so me na intervencijo v jeno selo bljizo Čakofca. Debelje svinje so dobilje vrbonca, veljko vručino i neso ništ jelje, a trebalje so iti na otkup. Visoka hiža kak saka selska hiža bogotoga gazde, na kat; dolji si skup živido, a gori nišče, kuha se v ljetni kuhnji, tu se na kauču i prespi, a prova kuhnja z ganc novem nameštajom je samo za pokazuvati.
Veljki kotec je na drugomo delo grunta; nutri por masni oprasnici koje so roktalje i z željeznim brumbama rovalje i debelje žmefke svinje, tovljeniki ot prek sto kil. Poljek zidanoga koca stori oreh, koj je delal veljkoga hloda po grunto. Nutri f prelji si je ftica futač naprojla gnjezdo, štiri malji ftičeki so popevalji futtt futtt futtt, rivalji se i sralji v gnjezdo. Muški ftič futač z dogim kljunom roval je odzoj drvenoga zahoda, poljskoga šekreta odzoj koca, iskal je žive kukce, doge gljiste, smrdljivo slamo i to nosil maljim ftičima. Nikvi hmonji jostrebi so ne štelji te goluždrave futače napasti i pojesti, jer je gnjezdo zadušalo i smrdelo, a stori futači z svoje riti bi njis pošpricalji smrdečinom.
Kolji zmozanoga koca si ne mogel dihati: strašno joka duha po gnojščici kaj je zadušalo i peklo za požerok, miris po ciknjeni kiselji ščavi, smljetomo šroto nasipanomo v zbetonerano kopanjo i povučina koja se ljepi za moje temne losi. Betežne svinje so lježalje i mirno magadilje terapijo- glajžnoto injekcijo odzoj vuha, neso se nit pomeknolje, a nit zacviljelje.
Ciglasta gnojščica tekla je vun s koca do zbetonerane jame mom poljek gnoja. Gori na jami je bil žmefki poklopec i nekva željezna ručka. Zakoročila sem i prepola z jenom nogom v gnojščico, betonjski poklopec je bil spocani, strgani i samo je čakal što bo nuter f smrdečo jamo opal! Belje, doktorske sljužbene hlače natopilje so se smrdečine, gosta gnojščica se cedila s cipelja. Preštimona gazdarica mi je pumpala zdeno vodo na pumpi i nekak smo hlače spralje, alji posebni smrod je ostal i širil se kolji mene! Takva smrdljiva kak futač, delala sem celji den. Te ljepi miris se ne mogel još por dni zvlječi s kože!
