Irena Vičević ovaj nas je put počastila komadićem svoje prošlosti – ovoga puta u kajkavskom duhu i jeziku, koji miriše na zemlju, znoj, kruh i koruzu. Nakon zbirke “Vutemtoga”, Irena se vraća s novim serijalom priča koje ostaju zapisane kao dragocjeni dio lokalne, narodne i osobne povijesti.
Priča “Ekonomija” vodi nas natrag u djetinjstvo, u dane ljetnih ferija kada su se djeca mijenjala u nadničare i robovali pod vrućim suncem na poljoprivrednim imanjima – bez kvalifikacija, ali s punim srcem i praznim želucima. Ispričana iskreno, sa smiješnim i dirljivim prizorima koje su mnogi možda zaboravili, a još više njih nikada nisu ni čuli, “Ekonomija” je dokument vremena, kajkavska oda mukotrpnom radu, prijateljstvu i snalažljivosti, ali i djetinjoj ludosti i borbi s grmljavinom i – Bibi Čoltom!
Otvorite srce i pročitajte – jer ni ovo nije danguba, ovo je stvaranje povijesti!
Sako školsko ljetno ferije holji smo na ekonomijo delat, kak NKV nekvaljificerani radniki na poljoprivredi. Neje to bi ljefki posel, sako jutro dok bi nejrajši spol do desete vure i pretezal se kak moček f toplji, mefki postelji, tebi pljehnota vura z debeljim batekima gori zvoni i ajt! Zdigni se i hoj napolje. Mom za zodnjim hižami f selji počinjalo je naše robovlasničko žmefko kmetofsko delo. Kopalji smo z motikami, pukalji i optrgovalji visokoga drača po mlodi koruzi: nekvo oštro trstino koja je mogla prste razrezati, pikečega visokoga kupinca, temno voščenjko koja je zgljedala kak malji smrdeči boreki, žilavo dogo piriko, širokoga jognjedaka i gostoga sloka zaplječenoga kolji prhke koruzne betve, optrgovalji smo malje koruzine zoljisnice, pukalji visoke cimere na semenskoj koruzi.
Kolji Veljke Meše smo cepilji sadje, sakojočke vočke, zapraf mi deca smo vezalji črne gumice, a iskusne žene cepljorke so z posebnim maljim cepljorskim nožekom odvojalje mefko koro z malji vočni podlogi, naprajlje znopačno slovo T i vuto prelo cpot mokre kore nametalje bombreke – pupe vočke plemke. Seklje so se doge grane z veljki vočki v matičnjako, odljistovaljo ljistje dolji.
Jen jakši zmed nas je bil vodor, nosil je friško zdeno vodo, z pumpe zabite v zemljo na gruntu ekonomije i žmefkoga plastičnoga pet ljitrenoga kanistra z čistom vodom, od reda do reda. Si smo pilji, i stolni radniki i mi nadničari, z istoga cinanoga lončeka, dagda smo skulave žvalje dobilji, a za gabljec smo jelji jeno malo jetreno pašteto f konzervi ot tridesti grami i krojec fčeronjega polubeloga kruha, slone ribice Eva sardina z pljehnote konzerve, domaj kvošene kiselje vugorke z slatkim jonošom i koje-kaj kaj je ostalo fčera od popolnevnoga obeda. Muški so si grelji konzerve Podravkinoga goveckoga gulješa na kardanu ot traktora i takvo toplo jestvinjo pomacalji s debeljim skrojcom kruha do zodnje drobtinice. Zreloga sodja – voča je bilo sakojočkoga: od jaboki ronjki, sljivi kolanjki, hruški Petrofki, kroglji breskovi, ciglasti mareljici i črljeni jagodi. To smo dobilji na voljo, kujko je koj štel i mogel pojesti. Na krojo veljke prcelje bil je drveni zahod, zbiti ot široki fosljini. Mel je nutri na sredini, jeno glaboko prelo skopano v zemlji, čučavac. Tu smo holji na šekret, ak je koga na debelo stisnulo. Ot tujko zeljenjove i sadjo kaj smo pojelji, gosto nas je tiralo na stron. Pocukati si se mogel i zmed redi vočki ilji goste koruze, navek je nešče strožo držal i išel ti za kumo. Tak smo to govorilji.
V jutro zrona so nas vozilji z veljkim traktorom na dogoj prikoljici, skorom kak pajceke, tijam do Dobrave i Kotoribe, na polje Požut. Sedelji smo na drvenim, trdim klopama, a žmefki traktor je brncal i tiral brzo kak je nejbržeše mogel. Rit nam je skokala gori – dolji, ak si kaj štel povedati ništ se neje čulo od traktorskoga pofkanja i brehanja, a gosti dim z visokoga rora toga željeznoga žrepca – traktora nas je zadušal. Iskusni šofer nas je vozil fljetno i šašavo, tak bedasto i noglo kak da vozi morho, a ne vredno deco. Čim bržeše i po vekšim grabama, tak kaj smo skokalji visoko, skorom z prikoljice vun i kaj smo na ritesnicama bolječe žulje dobilji!!
Na Požutu je rosla gosta koruza kaj si ne videl kraja net konca. Tu smo pukalji visoke cimere, koruzne metljice na semenski koruzi. Šest redi se pukalo, a dvo so ostalji kakti muški cimeri koji so hitalji drobno seme na ženske rede.
Med nami dečjim radnikima je bil jen joko visoki dečko, skorom do neba mo je bila krogla glova, kak tenjki jablan je bil visoki. Njegve doge noge so bilje vu visini naši dečji glovi. Zvolji smo ga Bibi Čolta. Dober dečok, kak je bil veljki, tak je mefko i dobro dušo mel. Gazil je uzduž po redi i fljetno pukal žote cimere z semenske koruze. Prvi je navek završil svojega reda i čakal nas kre pljitkoga kanola, de so skunkači regalji. Namakal si je doge noge i frugljave ščepce v zdenomo kanolo. Jempot i odjempot, z babinoga kota so išlji črni oblaki, kmičilo se ot mađerske stroni i z dneva se fljetno, nenadano noč stvorila. Strašno je grmelo, praskalo, nebeska žareča strela je vudrila, počila v debelji jegnjed kre pota, koj se reskoljil na pol! Bibi se joko zbesil i beššš! Tak je bežal kaj so ga noge v rit ljupalje, ot Požuta nekam dalko, vu smer cirkvenoga turnja!
Mi smo se, mokri i zbešnjeni skutilji kre mrcine od traktora, ščusnolji se kak piceki pot kvočkom, nekoji so se narivalji pot prozno prikoljico, alji dešč nas je sejeno namočil do golje kože. Dok smo se dopeljalji do sela, Bibi nas je cpot prvoga mosta, suhi kak barut, čakal. Bil je fljetneši ot dežđa! Dobežal je prije dimo z cipelj cugom, nek mi z traktorom!
